「千禧四大花旦」備受力捧 邊位有機會成為未來一線花旦？
早兩日就講過無綫好興搵個名目力谷一班小生上位，好似最近就傳出無綫要力捧被喻為「千禧五虎」嘅余德丞、羅天宇、朱敏瀚、周嘉洛及丁子朗。既然有小生，咁當然會有花旦啦，無綫都有出過幾代嘅花旦，好似有由趙雅芝、汪明荃、李司棋及黄淑儀嘅70年代「四大花旦」，今日就同大家睇下最新嘅「千禧四大花旦」，佢哋包括蔡思貝、馮盈盈、江嘉敏同埋何依婷，大家又認為邊位係未來嘅一線花旦呢？
蔡思貝
2013年港姐亞軍嘅蔡思貝（Sisley），入行後隨即備受力捧，2014年為劇集擔任女配角，2015年就已經升呢做女主角，不過佢嘅劇集角色唔討好，加上演技幼嫩及把聲太尖，令到唔少觀眾都唔鍾意睇佢嘅演出。去到2016年，佢喺《純熟意外》中將聲線壓低，觀眾對佢嘅表現先有少少改觀。近年佢成功憑《踩過界》「癲姐」趙正妹、《大帥哥》章沅婉及《鐵探》招喜悦翻身，獲得觀眾唔少好評。喺今年舉行嘅《萬千星輝頒獎典禮2020》中，蔡思貝憑《踩過界II》趙正妹一角登上視后寶座，成為無綫首位「90後」視后。
馮盈盈
2016年港姐冠軍馮盈盈（Crystal），擔任過唔少節目主持及大騷司儀，例如《 #後生仔傾吓偈》及《學是學非》等等，唔少網民都讚佢夠貼地同真性情。工作機會不斷嘅佢，更於《萬千星輝頒獎典禮2018》勇奪「飛躍進步女藝員」，發展可以話係相當唔錯。除此之外，被視為上位最快小花之一嘅佢亦有參與唔少劇集拍攝，戲份仲越來越重，例如《果欄中的江湖大嫂》MK妹小狼女、《白色強人》方書婷醫生、《反黑路人甲》警花顧欣頤、待播劇《逆天奇案》黑客Ana及《智能愛人》女強人Dorian等等。
江嘉敏
江嘉敏（Kaman）由16歲開始兼職做Model，入行後就開始參與劇集拍攝，扮演學生經驗豐富，不過最受歡迎嘅一定係2017年無綫劇集《親親我好媽》中飾演DSE學生嚴茜瑜，因外表清純及樣子甜美，令佢人氣急升更被封為新一代清純女神接班人。加入無綫短短幾年，佢已經拍過唔少劇集，例如《誇世代》、《福爾摩師奶》及《大醬園》等等，而未出街嘅劇集都有四套，包括《食腦喪B》、《七公主》、《我家無難事》（客串）及《黯夜守護者》，明顯備受公司力捧。
何依婷
2017年港姐亞軍何依婷（Regina），加入無綫後比同期港姐有更多機會，除咗加入《學是學非》做「是非精」及為大騷擔任司儀之外，2019年更開始接拍劇集，上年更憑《機場特警》飾演空姐兼網紅安安而人氣急升。得到網民喜愛嘅Regina，獲得無綫高層點名力捧，早前宣布翻拍嘅經典劇集《十月初五的月光》，女主角君好一角都由佢嚟接棒。
尚無回應.