港版鄭多燕 53歲劉美君 公開美魔女餐單
劉美君 回復單身
劉美君經歷過兩段婚姻失敗、育有三個13至34歲兒女，去年10月宣布同相戀八年混血男友Steve和平分手，回復單身後反而更自由自在。劉美君平時早睡早起勤練瑜伽、閒時留守加州湊孫為樂，近日則回流香港為ViuTV選秀節目《全民造星》擔任導師、又為9月舉行之《環球高歌陳百強》紀念演唱會練歌籌備，冇咗愛情，生活一樣過得滋陰又充實。
年過半百、已經抱咗兩個孫，劉美君除咗身形、面容keep得fit，最緊要都係保持心境年輕，日日潮玩instagram分享工作湊孫健身日記，仲識po完相加插大抽hashtag增加話題同點擊。日前上載高難度瑜伽動作、順手晒埋完美 體形同腹肌外，最唔話得係公開埋早午晚三餐食譜教埋粉絲一齊健康一齊fit。簡單嚟講，劉美君話自己朝早係「牛」，只飲有機、食草牛所產之乳酪，中午就係食肉獸，而夜晚嗰餐就變素食者。重點都係早睡早起、三餐定時、勤做運動，仲有堅持夜晚7點以後絕不進食。由以前被朋友稱之為「黑洞」食唔停，到依家有節制有規律又忍得口，你估53歲美魔女易做㗎？
回流造星
上月劉美君由美國返港，應ViuTV之邀擔當《全民造星》導師之一，年紀最大、心境反而最年輕，經常自爆睇世界盃或選秀都係貪靚仔。
最in嫲嫲
與兩任丈夫先後誕下三名兒女，三年前劉美君仲抱埋孫，如今細孫女都已經滿一歲，工作、出埠以外，最大樂趣就係留守加州玩孫。
童心未泯
雖然冇拖拍，不過劉美君勝在朋友多、興趣又廣，日前同老友黃子雄兩個加埋102歲齊齊入場睇《超人特工隊2》。
少女味濃
平時潮玩IG同影相apps外，劉美君最強係年過半百依然有副童顏，日前敷住自製mask自拍po上網，鬼馬精靈個樣竟然仲有少女味。
與孫同樂
平時唔使工作會留在加州湊兩個孫，有氣有力一齊玩之餘，最緊要係仲有童心，搶咗孫仔架兒童三輪單車踩。
素顏省鏡
身材fit爆、皮膚白滑，出席活動盛裝示人當然省鏡，平時公餘在家，劉美君亦都信心爆棚愛騷真‧素顏。
劉美君這位逆齡嫲嫲身形弗到漏，腹肌與馬甲線盡現，全因多年來自練瑜伽，已成高手可做任何高難度動作，她指從來不花錢在美容療程，健康心得亦很簡單，就是早睡早起，吃得健康。
尚無回應.