林建名遭低胸女伴撇低 榮文蔚拒認「變臉」
洗米嫂陳慧玲（Heidi）﹑孫佳君﹑告東尼伉儷﹑兒子告崇恩及女友莊思華﹑林建名與女伴﹑榮文蔚﹑李樂詩與老公﹑王賢誌及王大業等，今晚喺金鐘港麗酒店出席一個頒獎禮。
當林建名（大少）與女伴現身時，女伴繑住大少隻手，當記者係咁影時，女伴突然表現驚青喪避鏡頭，更撇下大少，搞到大少要自己喺佈景版影相，女伴就自行走入場，相當避忌。
另外，莊思華與告崇恩拍拖六年，今晚恩愛出席，問到係咪好事近？莊思華表示：「未知呀，慢慢嚟，拍咗拖六年。（七年之癢？）唔驚。」講到同男友家人出席活動，儼如一家人？佢話：「大家相處好開心。（結婚方面點？）唔係我話事。（求婚未？）未，大家有共識，慢慢嚟。」
此外，榮文蔚被指變臉，個樣同之前唔同咗，佢解畫：「做facial及運動，有好嘅化妝師，同埋一間新salon整頭，自己鍾意做gym﹑跑步行山。」問到佢個樣唔同咗？榮文蔚就話：「唔覺囉，呢個化妝師化得好靚。」講到最潮興微調，問佢會否試？佢話：「自己做laser facial，（打啲嘢入去？）唔會。（崇尚自然？）係囉。」
問榮文蔚「新春天」嚟未？佢話0依家專注工作，咁有冇追求者？佢表示唔講呢啲﹗
由四位成員楊澤怡（Shirley）、李詩詠（Ceci）、潘穎琳（Mizaki）及周葆諭（Christy）組成的女子組合FFx，早前憑合唱歌《Sugar Baby》廉價MV忽然爆紅，惜同時遭網民恥笑騎呢，甚至用粗口問候，但原來笑聲背後，四位成員各有坎坷故事。幼時父母離異，要入住兒童之家及半工讀賺錢的Shirley，加入FFx前為養自己影私影，Shirley今日接受本報獨家訪問時更泣不成聲自爆：「我俾人性侵犯咗！」(採訪：李察)