余德丞起勢追 生擒劉穎鏇
余德丞及劉穎鏇於新劇飾演小情侶，但竟然沒有「激戰」場口，最親密只限於余德丞仆倒「生擒」女方。劉穎鏇大呻被男方追問體重，令她非常無奈，場面爆笑！
無綫新劇《青春不要臉》拍攝得如火如荼，劇情講述劉穎鏇（Tiffany）是新進演員，對演戲沒太大信心，故找來余德丞（Dickson）於家中綵排︰「我哋好認真對戲嗰陣，佢唔小心差錯腳，齊齊跌咗落梳化。」Dickson笑言︰「嗰下係唔小心仆親撲咗落佢度，但就係因為呢一下，佢喺劇入面就開始對我心動，同時呢下亦都係我哋全劇最Close嘅動作。」問Tiffany有否尷尬？她笑言︰「套劇係有搞笑成分，佢扮豹追我，成件事係輕鬆、搞笑。」
追問體重
問到之後可會拍攝更激的場面？Tiffany最期待一齊踩Roller︰「對我哋兩個都係挑戰，因為本身唔識踩，工作關係又冇乜時間訓練，所以依家有啲擔心，盡量抽時間練多啲。」至於自稱運動天才的Dickson拍心口表示絕不擔心︰「相信好似學踩單車咁，識咗唔會唔記得。」並自爆反而期待拍另一場口︰「有次我問佢幾重，因為有場戲佢要坐喺架車入面，而我要推佢上斜路。」Tiffany即指着他投訴︰「佢問我係咪同佢一樣重定重過佢，知唔知咁樣問，對女仔嚟講係好大打擊！」男方即補鑊說︰「佢又高又瘦又靚，仲有肌肉，到時我會努力啲。」
斷食操肌
講到Tiffany最近為另一新劇密密操肌，她笑言未有成果︰「操肌真係唔易，我依家仲斷食緊，但拍緊劇就難啲，所以都係盡力，唔使返工就斷食18個鐘，希望身形不停有轉變，畀大家見到唔同一面嘅我。」問到Dickson可有傳授操肌心得給女方？他說︰「冇特別傳授，見佢為下套劇咁有心係好事，我都好期待佢個結果，唔知會唔會變成盜墓者羅拉咁款呢？」
