關嘉敏憑《全民造星III》人氣急升 倒戈加盟無綫遭網民鬧爆兼unfollow
ViuTV皇牌節目《全民造星III》捧紅唔少藝人，而Bingo隊長「卡文」關嘉敏（Carman）就係其中一個。卡文入行五年，一直都無咩人認識，直到參加《全民造星III》後人氣急升，雖然佢喺20強比賽中輸俾陳葦璇而未能打入10強，但之後都獲得唔少工作機會。好多廣告商搵佢拍廣告包括雪糕、化妝、護膚品，甚至連安全套都有，卡文自爆近月狂賺幾十萬，成功脫貧。不過近日有人發現關嘉敏簽約加入無綫成為旗下藝人，卡文直言簽約係「天盟娛樂」安排，Tommy Chu（天盟高層）介紹佢俾樂易玲識，樂小姐更賞識佢同佢簽約加盟邵氏，以後會由兩間公司共同管理。佢希望向劇界發展，仲話最想同陳展鵬合作。佢話雖然有新嘅發展，不過都唔會放棄唱跳。
卡文倒戈加盟無綫引起唔少網民不滿，紛紛留言大鬧及指對佢失望，例如「無良知兼忘本，觀眾廣告商鍾意嘅係Viutv全民造星卡文，而唔係cctvb卡文呀。」、「記住入左cctvb就咪再用造星既名義」、「本來覺得你輸得好唔抵，而家明你點解紅唔起，原來係自己揀嘅，不過都好，早啲自毀好過浪費fans啲時間嘛」、「睇viu 先識你，轉頭就去cctvb…極失望…」及「對您勁失望 枉我之前睇全民咁支持您 unfollowed」等等。另外，仲有唔少網民話已經取消追蹤佢IG。
26歲嘅關嘉敏有「翻版周秀娜」之稱，2016年以以Bingo隊長嘅身份出道，不過星途麻麻，最為人熟悉嘅都只係2016年參加ViuTV真人騷《脫獨工程》及曾與林作拍攝微電影《敗家仔》。除此之外，佢亦有參演劇集《黑市》嘅「碟仙」和「過夜」單元、客串無綫劇集《 法證先鋒IV》及為探靈節目《又要睇又要驚》同名MV擔任女主角等等。直至上年參加《全民造星III》憑住出色表現，令佢知名度大增。
