TVB收視︳《開心大綜藝》高收《尋人記》帶挈收視升近5成
TVB最新公布4月5至11日收視，呢個星期看點唔少，逐個同你拆！
曾志偉上任後，唔少全新綜藝節目都喺呢個星期出街。先睇星期日重頭節目《開心大綜藝》成績，TVB都知係焦點所在，所以翌日已經公布收視有22點。而加埋跨平台總收視就有23.7點。比起上星期嘅《聲夢前傳》同《流行經典50年》（前半小時）平均17點大幅上升。另一個因為曾志偉上場而大搞嘅節目《勁歌金曲》，收視就比較令人失望，只有13.8點，對比《流行經典50年》早前嘅低位更差。
星期六都有2個新綜藝節目出街，選秀節目《聲夢傳奇》有18.2點，不及前一周播電影《證人》。不過選秀節目往往要去到比賽中後段先至多人注意，到時收視或者會上升。而余安安、羅敏莊及陳凱琳主持嘅訪談節目《日日媽媽聲》，目標清晰專攻婦女，喺星期六夜晚十點呢種時段有17.4點收視算係咁。
至於該周星期一至五晚就有《尋人記》登場，以往「新聞gag王」方東昇主理嘅軟性新聞節目都有捧場客，今次唔再出國採訪拍見聞，反而更有新鮮感，錄得22.3點收視甚至比台柱《東張西望》更好。對比上一檔節目《你又估我唔到》，同時段收視更加反彈近7點，觀眾人數大約多5成！
綜藝強勢，更見劇集乏善可陳。《大步走》結局周未能一如前幾套劇咁爆seed彈升，20.1點收視只比前一周微升，全劇平均收視亦唔過20點，暫時成為年度包尾。而第一周表現唔錯嘅《愛美麗狂想曲》，呢個星期收視跌至22.7點。就連《愛•回家之開心速遞》都近況回軟，全周冇一日過25點。即管睇吓被寄予厚望嘅《伙記辦大事》會唔會做到嘢啦！
3月29至4月4日︳《大步走》終於發力貼近20點 《流行經典50年》埋尾迴光反照
最新一份TVB收視報告出爐，日期係3月29至4月4日，雖然中間係長假期，但收視唔似過往咁因為觀眾外遊而下跌。
播到第4周嘅劇集《大步走》低迷過後終於有少火起色，收視有19.8點，貼近20點及格線少少。但係睇返幾個禮拜嘅成績，平均收視都係少過20點，似乎要靠結局周谷一谷先可以避免包艇。
上一周首播嘅《愛美麗狂想曲》同《大步走》都係喺TVB網上平台播放過再推出，不過成績好得多，第2周收視23.5點，只係比之前微跌。喺劇情冇咩新意嘅情況下，李佳芯靠觀眾緣都幫到收視，云云花旦之中Ali的確值得多啲機會……咁當然《愛美麗狂想曲》有「年青人偶像」曹永廉同蝦頭談情說愛，都係賣點……啩。
2大收視之寶《東張西望》平日keep住22點水平，反而「重頭劇」《愛•回家之開心速遞》近幾個禮拜稍為回軟，今個星期有24.7點，比起上2個星期流失大約8萬觀眾。另外喺該個星期六晚因為廖啟智逝世而播放嘅電影《証人》，收視有18.8點，比慈善show或者播演唱會更好，大台可以考慮星期六播電影，好過身水身汗搞綜藝。
點解咁講？該星期日播放選秀節目《聲夢傳奇》熱身篇《聲夢前傳》，收視有17.3點，比起小本經營嘅《港產旅行團》同《香港原味道》更遜色。如果正式出街收視都係咁上下，最驚嘅應該係一班參賽者。而去到「大結局」嘅《流行經典50年》，可能用「最後一集」呢個綽頭有吸引力，收視反彈到17.1點，比起前兩周嘅低位14.3點大幅反彈。家燕姐可以放心去湊孫啦～～
3月22至28日︳《愛美麗狂想曲》爆冷成今年開播最佳收視 《大步走》繼續跑唔郁
今次收視報告日期係3月22至28日，嗰個星期嘅亮點係半新劇《愛美麗狂想曲》首播。稱為「半新劇」梗係有原因，因為《愛美麗狂想曲》一早已經喺網上平台串流播放﹐今次只係電視首播而已。不過首周表現居然有驚喜，收視有23.6點，以0.2收視點力壓《陀槍師姐2021》，係今年開播成績最好劇集。雖然《愛》題材唔算新穎，但係有觀眾緣唔錯嘅視后李佳芯坐陣，而且唔少宣傳都力sell Ali露背場面，算係爆個小冷跑出。
嗰個禮拜10點半綜藝時段都係有新節目上場，由阿Bob同張秀文主持嘅《你又估我唔到》臨時頂替原定嘅《諸朋好友2》，但係對收視似乎冇幫助，《你》首周得14.1點，比起之前嘅《天天開運王》跌1.5點。清談節目其實更有叫座力，J2嘅Tiger’s Talk收視唔錯已經反映呢點，而且《你》嘅環節唔見得有幾出眾，似乎高層打錯如意算盤。
另一線劇 《大步走》仍然未有發力之勢，第3周收視跌返落18.6點，距離合格水平20點都幾遠。唔少觀眾都認為《大步走》以長跑做賣點，但係劇情又係愛情＋連串誤會，同跑步冇咩關係。不過近期好幾套劇集都係最後一周表現反彈，或者《大》最終都會彈返上20點，即使係咁都好難避免成為年度收視包尾劇。
3月15－21日︳《失憶24小時》結局週發力 《流行經典50年》越做越頹
TVB最新公布3月15－21日嘅收視，嗰個禮拜嘅焦點係《失憶24小時》結局成績。《失》前20集收視徘徊喺22至23點之間，照理結局唔似有咩起色，但係勢估唔到21－25集平均收視有24.4點，星期六播嘅大結局都有23.4點，雖然未能去到《陀槍師姐2021》大結局25.8點嘅佳績，但係整體計已經算今年暫時收視最好嘅劇集。至於首周低收嘅《大步走》，去到第2周稍有起色收19.1點，但係仍未過「安全線」20點。今年TVB兩線劇收視都嚟個尾段發力，《大步走》又會唔會有同樣情況？
向來星期六收視都會麻麻，最多有之前播吳孟達作品能夠稍為谷起收視。但係嗰個星期六(3/20)，竟然連《東張西望》都不足20點收視，另一台柱《愛•回家之開心速遞》亦都只有22.5點，難怪曾志偉上場要推一大堆綜藝救亡。
而即將收檔嘅《流行經典50年》，好似自從傳出4月唔再播之後，收視逐個禮拜「落樓梯」！最新成績係14.3點，再跌半點，唔知到最後一集會有幾多呢？
3月8－14日︳《大步走》開播 收視大暴跌 三大公司歌手亮相救唔到博愛show收視
今個星期睇吓TVB3月8－14日嘅收視，呢個星期有陳山聰、姚子羚主演嘅《大步走》開播，上一檔嘅《陀槍師姐2021》本來收視平平，去到尾段先大爆發，大結局仲有近26點收視。但係《大步走》就未能食住個勢，相反仲差強人意，只係得18.8點。黃金時間劇集唔過20點，基本上已經唔合格，而且仲要比配音劇成績更曳……可能鍾意跑步嘅都落咗街跑步，冇睇啩。
另一套黃金時間劇集《失憶24小時》有23點，繼續喺22－23點之間徘徊，未知結局周會唔會有驚喜嘞。上個禮拜提到，2大台柱《愛•回家之開心速遞》同《東張西望》平日一至五收視已經連跌3周，呢個禮拜終於喘定，《東張》有22.4點，《愛•回家》有25.4點。至於開播以來收視麻麻嘅《天天開運王》，再創新低得15.5點，但係最尾一集介紹關之琳億萬豪宅，可能引起觀眾注意，等睇下個禮拜收視報告。
前2個星期六晚都播吳孟達＋周星馳作品，收視十分出色，呢個星期就有慈善show《博愛歡樂傳萬家》。今次《博愛》係3大唱片公司同TVB破冰之後首個大騷，3大都各自安排咗歌手參與，唔再只得星夢幫，不過節目收視只有13.9點，比起前一周重播《逃學威龍》大跌近7點。照咁睇，即使歌手卡士強咗，但係節目新意欠奉，怕且TVB要靠搞起音樂節目谷收視並唔容易。而已知會摺埋嘅《流行經典50 年》再跌到得返15點唔夠，難怪要斬！
3月1至7日 － 重播《逃學威龍》再破紀錄 《陀槍師姐2021》結局爆升
今個禮拜同大家睇下3月第一周嘅收視成績。嗰個禮拜嘅重點，係收視一度每況愈下嘅《陀槍師姐2021》，去到結局周有冇起色。前一個禮拜出現反彈之後，最後5集收視再度上升，平均有23.6點，大結局更加有25.8點，可以話係出人意表。不過拉勻計，全劇收視難以同前4輯《陀槍師姐》相提並論，會唔會再開續集？可能要搵返歐陽震華＋滕麗名先得！
另一套一至五黃金時段劇集《失憶24小時》，第3周收視22.3點，比上周稍跌。《失》播咗3個禮拜都係徘徊喺22－23點之間，成績同外購配音劇《燕雲台》差唔多，有齊郭晉安＋譚俊彥呢個組合竟然得呢個成績，有啲失望喎。
前一周吳孟達逝世當晚，重播電影《審死官》錄得18點收視，打破TVB3年來周末電影時段收視紀錄。呢個星期重播另一套達哥經典《逃學威龍》，收視更勝一籌有20.6點，比《審》多2點。
曾志偉上場之後，有傳做咗3年幾嘅《流行經典50年》可能4月就要摺埋。睇返收視成績，《流》又真係幾流。前2集得16點，最新收視再跌至15.4，幾乎係周末黃金時段最差嘅綜藝節目，難怪被人郁。
值得一題係，2大收視台柱《愛•回家之開心速遞》同《東張西望》一至五收視已經連跌3周，對比2月中2個節目平均唔見差唔多2點收視。而下次收視報告將會睇到《大步走》開播首周成績，估計唔多亮麗，令大台調早一個鐘避免對撼ViuTV嘅《最後一屆口罩小姐》。
2月22至28日 – 吳孟達逝世 重播《審死官》創3年收視紀錄
TVB最新公布2月22至28日收視資料，最矚目嘅唔係自家製節目表現，而係重播嘅電影《審死官》。
吳孟達喺2月27日星期六病逝，當晚TVB播放達哥、梅艷芳同周星馳合演嘅《審死官》，結果錄得18.4點收視，係翡翠台2018年以來周末電影時段收視之冠，比前一個星期播嘅《戰狼2》高出接近2點。而星期日追悼達哥節目《無可比擬的演藝泰斗 永遠懷念吳孟達》亦有21點收視，對比同時段前一周播出嘅《流行經典50年》足足上升5點。
至於兩線黃金時段劇集，第2周嘅《失憶24小時》微跌0.1點，收22.8點，不過不失。開播以來收視每況愈下嘅《陀槍師姐2021》，去到尾段終於有起色，錄得22.9點，比前周升一點。另一個收視越跌越有嘅係《天天開運王》，已經連跌3周，2月最後一星期收視只有16.7，似乎響起警號，但係仲有個幾禮拜節目未播……
其實嗰個星期一至五嘅黃金時段節目，竟然係得《陀槍師姐2021》收視上升，收視王牌《愛•回家之開心速遞》同《東張西望》都比前周跌1點，反而2個節目周末表現又比前周好。
下星期TVB將會公布《陀槍師姐2021》結局收視，到底會唔會保持升勢帶來驚喜？而《失憶24小時》又會有咩表現？
