Shirley@FFx自揭18歲拍私影 遭性侵
由四位成員楊澤怡（Shirley）、李詩詠（Ceci）、潘穎琳（Mizaki）及周葆諭（Christy）組成的女子組合FFx，早前憑合唱歌《Sugar Baby》廉價MV忽然爆紅，惜同時遭網民恥笑騎呢，甚至用粗口問候，但原來笑聲背後，四位成員各有坎坷故事。幼時父母離異，要入住兒童之家及半工讀賺錢的Shirley，加入FFx前為養自己影私影，Shirley今日接受本報獨家訪問時更泣不成聲自爆：「我俾人性侵犯咗！」(採訪：李察)
被封為「大學女神」的Shirley，讀書時期亦曾做私影女模。本報日前獲得一批Shirley早年拍下的性感私影照，包括她只戴胸圍及穿內褲擺各種誘人甫士，以及一輯她背面的全裸照。
關於這輯相片，Shirley今日在經理人Sam陪同下，接受《蘋果》獨家專訪，憶述當年住兒童之家裡的青年宿舍，需撲水交租，有感補習不夠幫補，才做私影。18歲那年(即3年前)，一次拍私影時慘遭性侵，但因私影違反青年宿舍規矩，故此事發後Shirley不敢報警。
全程強忍淚水的Shirley於訪問完畢後，一度泣不成聲，又自責愚蠢，她說：「其實呢件事埋喺心入面三年，今日講咗出嚟個心都舒服咗。」
Shirley說：「由中三開始，我就住兒童之家，一直住到我有學校宿舍，因為住兒童之家入面嘅青年宿舍要交租，加上返學都要用錢，所以一直好努力搵錢幫補支出。有同人補習，但始終都係唔夠，所以17、18歲開始去幫人影私影。影比堅尼每個鐘大約有三百蚊，一向冇影裸體，只係得嗰次。」
事隔3年，Shirley憶述當日的事仍然緊張，不時全身抖震，她說：「幫我影相嗰個X先生，本來係話同我影比堅尼相，影完一陣，佢畀本相簿我睇，入面都係一啲模特兒影嘅裸體照，佢問我可唔可以擺同樣嘅甫士影一輯。本來我唔想，但因為佢未畀錢我，而且佢話可以加到500蚊一個鐘，我又真係等錢用，所以就應承咗影。
「到差唔多影完，呢個X先生就推我落床，佢性侵犯咗我……當時我好驚，我想走同不停大嗌唔好，我有推開佢、有反擊，但反擊唔到，我係咁喊，之後我即刻着番衫衝出門口走。」如前所述，當年Shirley不敢報警，擔心被因為被揭私影、觸犯青年宿舍規矩，隨時被送進女童院。Shirley說：「我諗番知道自己好蠢，依家講出嚟希望提醒有幫人影私影嘅女仔要小心，要保護自己。」
問Shirley之後有否再跟X先生見面？她承認兩個月前見過對方：「佢其實一直都有喺wechat約我出去，我當然冇出，回覆都係推佢，直到之前知道佢入咗娛樂圈做幕後，我真係好驚，早排佢約我出嚟食飯見面，我應承佢出嚟，因為我想叫佢刪除啲相同埋唔好同人講，當時佢答應咗，我都覺得自己蠢，佢一直都呃我。」
