容祖兒病癒復唱 狀態大勇
（香港文匯報 記者 子棠）容祖兒因病延期三次的《ANOTHER SIDE …… JOEY·MY SECRET·LIVE》前晚再度恢復演出，病癒後祖兒狀態大勇；而老闆楊受成夫婦、好友蔡卓妍等均有到場為她打氣。祖兒自爆曾病到迷失自我，冇信心 ，唱唔到歌，幸得導演彭秀慧開解。在迷惘沮喪過後祖兒更加堅定地相信舞台便是她的良藥，亦是她的底線。祖兒話她同舞台的關係好比戀人，讓她變得更好。
祖兒於上月在演藝學院展開的34場演唱會，當中有8場因病三度延期，前晚復唱。開場不久，祖兒就向觀眾致歉說：「我好想藉呢個機會同大家講一聲抱歉，因為之前唔舒服，令大家要延期。雖然我知道，在座每一位朋友都願意等待……今日來到演藝學院都係最疼惜容祖兒嘅人，因為你哋對我嘅愛，我同自己講，我今日一定要振作。今晚MY SECRET·LIVE正式開始 。」台下歡呼聲和掌聲不斷，大叫「我愛你呀」，逗得祖兒開心道：「真係好好反應，你哋反應愈好，我把聲就愈好，好神奇㗎，你哋係醫生，我係病人，掌聲、歡呼聲就可治癒我。」唱到第三個環節，祖兒又謂：「把聲好神奇，真係愈唱愈開，可能因為又跳又唱出一身汗，感冒水尾最煩人，希望今日冇令大家太失望。」觀眾再報以熱烈歡呼聲。
舞台是良藥亦是底線
祖兒有感而發表示：「15歲參加歌唱比賽，今年已入行第24年，到現在可說是中年好聲音，亦好開心搵到終身喜歡的職業，同時可以一直保持一個純綷的心，無論站上台做歌手，或者坐台下做觀眾我都好投入，因為我好鍾意香港流行曲，我係聽香港流行曲長大，呢啲音樂一直滋潤我、陪伴我行人生路，好希望我人生裏面可以唱好多歌，無論係Side Track 或主打，只要有一首歌可以陪伴你哋，都係我啲福氣。過去十日，對我嚟講實在係太漫長，冇人希望病， 呢幾年已經教識我哋，好多時都唔可以好好預計到自己。計劃趕不上變化，真係有幾日，我病到覺得自己迷失咗，好沮喪，冇晒信心，冇晒心思，唱唔到歌，作為一個喜歡表演的人，我希望每一次都可以畀到中等水準，但係不停延期，我覺得好Sorry，覺得身體好唔爭氣，直至上星期有一晚，演唱會導演彭秀慧發覺我已經魂魄都唔齊，約我傾計，佢同我講，我哋鍾意表演，未到最後一刻，未到觀眾話你唔好唱，你都應該繼續努力唱，觀眾知道你病會體諒你。今日我企返喺度，真係好多謝彭秀慧心靈上畀咗我好大鼓勵，經過今次，我人生再豐盛啲，唱歌又再好聽啲，舞台就係我底線，只要我可以企喺舞台，我可以接受到你哋嘅愛，真係藥到病除。」
容媽媽是心中的米芝蓮
完騷後，祖兒表示仍要好小心保護身體，希望狀態可以更好。此外，祖兒在社交網貼出媽媽煮的午餐，感謝媽媽由她綵排開始，每天風雨不改，一心一意地照顧她，是她吃過全世界美食之後最喜歡的米芝蓮，亦不捨得媽媽太辛苦照顧自己。祖兒續謂：「我只要有勇氣站上舞台，我就會一天比一天好。我和舞台的關係好比戀人，它讓我變得更好，活得更好，更願意付出。亦感覺到各方好友的支持。盡做！」
