【第三胎好鎮定】陳豪帶大肚茵媺 離港過聖誕
陳豪今日喺灣仔會展為「香港．設計廊」新裝開幕典禮主持開幕，着恤衫打呔嘅佢話係老婆陳茵媺（Aimee）幫佢配襯，陳豪仲好骨痺咁話：「佢係我fashion大臣，我嘅嘢全部交晒畀佢，佢係我財產，我嘅即係佢，佢嘅即係我。」佢話今個聖誕節仲可以趁Aimee未生之前一家去旅行，而Aimee今胎第三胎，已經佗咗差唔多四個月，冇第一胎嘅時候咁擔心，信心大咗，預產期係明年4至5月，但佢冇透露今胎BB嘅性別。對於恐襲頻繁，會否選擇返加拿大？陳豪話：「作為父母當然想畀小朋友放眼世界，但太矚目嘅地方要避開，見到佢哋開心係人生嘅喜悅。」
同場嘅雷頌德（Mark）被問到太太梁家玉（Jade）主持嘅節目《閨密教煮》，有指訪問內容過多，Mark就解釋因為內容太豐富，所以好難剪走內容，對於太太嘅表現，Mark回應：「佢第一次算係稱職，暫時見唔到有改進空間。」Mark仲話囝囝出街食飯時，見到媽咪喺電視出現，覺得好奇怪，Mark話：「佢以為媽咪只係喺屋企個電視先至出現，都幾搞笑。」
