12分鐘搞㷫Sammi舞台做主場 子華借情史 高呼香港要童話
44歲的鄭秀文（Sammi）前晚帶病在紅館舉行第二場個唱，獲宣佈「封咪」兩年的棟篤男神黃子華撐場，破戒現身做特別嘉賓吹水，幫口為失聲Sammi製造爆笑12分鐘炒熱全場氣氛，子華神教訓Sammi作為專業表演者，最重要是唔好回水，更公開催她跟老公許志安快生BB，並為他們的兒子改名為「許勝不許敗」，借兩人的情史高呼：「香港要童話！」
鄭秀文前晚假紅館舉行第二場「Touch Mi2世界巡迴演唱會2016」，雖然感冒未癒聲音沙啞，但Sammi依然堅持show must go on，老公許志安誓必晚晚現身觀眾席支持，Sammi唱到口乾搵水飲說：「乾到碌蔗，好缺水。」前晚表演嘉賓竟然是男神黃子華，兩人僅於前年合作拍電影《失戀急讓》，子華的驚喜登場令全場尖叫拆天。
催Sammi生B
今年4月，子華神接受蕭若元的網台節目訪問，坦言覺得現時的香港「好多嘢笑唔出」，宣告封咪兩年停做棟篤笑，然而，前晚子華破戒撐Sammi再講棟篤笑，甫上台即自嘲：「我成日病，試過臨出場，喺個廁所又屙又嘔。而作為一個專業表演者，最緊要係乜嘢？就係……唔好回水！」子華又爆跟Sammi完全不熟，只拍戲見過一日：「佢問我：『子華你有冇睇過19世紀俄國大文豪陀思妥耶夫斯基嘅《罪與罰》呀？』跟住我就唔想睬佢喇，因為我係冇睇過㗎。」令Sammi笑到走音捧肚。
接着戲肉上場，子華擺許志安上枱勁放笑彈：「你哋係咪好想許志安同Sammi講……」Sammi用高八度走音聲線制止：「千祈唔好中計呀！」子華行遠跟Sammi保持距離，施施然說：「你太瘦喇！咁樣點生BB呀？」Sammi沒好氣說：「邊個話生BB？」子華抵死答：「仲得㗎，你今日攰啲，但休息完你會唔會有啲力。」
